🇰🇿НҰР-МҮБАРАК УНИВЕРСИТЕТІНЕ ӨЗБЕКСТАН РЕСПУБЛИКАСЫНЫҢ АЛМАТЫДАҒЫ БАС КОНСУЛЫ БАСТАҒАН ДЕЛЕГАЦИЯ КЕЛДІ
✅Бүгін Нұр-Мүбарак университетіне Өзбекстан Республикасының Алматы қаласындағы Бас консулы Аброр Фатхуллаев бастаған делегация ат басын тіреді. Мәртебелі меймандарды Нұр-Мүбарак университетінің ректоры, профессор Мұхаммад аш-Шаххат қабылдады. Өзара танысып, университеттің тыныс-тіршілігі жайлы ғана емес, екі ел арасындағы ежелден туыстық қарым-қатынас туралы да кеңінен қозғалды.
✅Делегация ректор қабылдауынан кейін университетте Өзбекстаннан келіп білім алушы жастармен жүздесті. Олардың қатары -39. Негізгі мақсат, алдағы 30 сәуірде өтетін Өзбекстан Республикасы Конституциясының жаңа референдумы жайлы түсіндіру. Бас консул екі ел достығы жайлы айта келе референдумды жан-жақты түсіндіріп өтті. Өзбекстан Президенті Шавкат Мирзиеевтің адам құндылығын негізгі нысана етуі жайлы кеңінен сөз етті. Сондай-ақ Өзбекстан мұсылмандар діни басқармасының Самарқанд өкілінің орынбасары Яқубжан Мансуров пен Өзбекстан мұсылмандары діни басқармасының Ташкент қаласы Ислам ата мешітінің имам-хатибі Иулдошали Каримов студенттерге дін төңірегінде насихат айтты.
✅Өзбекстандық делегация қазақ пен өзбек халықтарының ежелден діні бір, тілі туыс, тату-тәтті көрші елдер екенін мақтанышпен айта келе, алдағы өтетін референдумға студенттердің белсенді дауыс беретіндіктеріне сенім артты. Білім алу жолында сәттілік пен береке тілеп, шынайы тілеулестіктерін білдірді.